Patria

Patria; patria mía,

con fértil voto acepto

la sangre vieja y el luto de la tierra.

Pero te pido, sin tregua

y con desesperación, como pide a la madre

el niño de llanto lleno:

acoge mi palabra cual hoja de roble

por el aire desprendida;

la que es sola, en la soledad amarga de la Asturias perdida.

Hai un tiempu per mayu…

Hai un tiempu per mayu

cuando les xeografíes mestes de carbayos

tienen la diamantina lluminosidá del estivu venideru.

Corrompinaos de retueyos d’un verde tresparente

resplanden con más allegría que nenguna arborescencia;

cola mocedá del sangre vexetal

enantes de camudase nuna dura arteria,

la d’esi ser de los mitos de voz suave y acentu vieyu.

Lluminosu ye’l tiempu cuando los carbayos s’ornien a ellos mesmos.

Tiempu en que los carbayos se cubren altivos

coles rescamplantes vistimentes de los dioses vexetales.

Viaxeru d’Inbher Colta

Parte, viaxeru, a la escontra del aire, y nun refugues nenguna aventura pelos incontables territorios de la palabra. Sicasí, esbilla una rixa de poesía, y afaya la persona -quiciás dios- que forxa armes desenfundaes nun abellu  de sabios faladores.

D’una sablera amiga

Quedes, sablera amada, xunta les paroles que’l folaxe esparde en xuliu; habitando l’afoguín esplumosu de la costa, col mesmu bayu que la herba.

La barbuza

Desque comenzara la barbuza calles, bañada pola lluna primera. Unos gotos tresmanaos desafíente’l finu empielgu de les ceyes. Digo’l to nome, cola priesa los venceyos, y nello sé que valeru queda’l mieu. Los pasales del destín han dir allugándonos no fondero, pero hoi nin augua nin tristures son pa esbrenganos el tiempu. Mañana pue qu’asentemos.

El canciu

      Retrañen los pasos de la vida tres l’azogue’l mieu, y tu cuerres per ádane de silencios, párvolu y cola fe escuyerando igual que les regonaes nel estivu. Nel aire sientes un canciu que ñaciera de bien en tiempu; la suerte de desfacete na soledá y enferronate al destín.

     Amayules enfiláu pol ascu ante’l rostru de la muerte, acingando la cercanía de Dios cola ofensa a la seguridá de los piadosos.

     El sangre del mundu circunda aquella muda xeografía y otra vuelta anueva, al encruz del alma, un vieyu coru d’ánxeles cayíos col mesmu canciu arramáu.

     ¿Ye’l mio nome lo que vosotros pronunciáis?

     Con manos trémboles garro’l brazu d’un amigu, con esi conocíu empuxe qu’ensembre me conduz a tarrecer la dignidá del xustu, a entregame a la incertidume de lo perdío, furando la subversiva esistencia como si d’una azaría se tratara.

Valle de Cuna

L’últimu setiembre inocente cuantahoi que nun tien presencia, pero tovía los besos s’enfoten n’esguilar per un fríu cuellu de nácar y azucena, como si fuera ayeri cabo la ilesia.

DOCUMENTOS: Saluda comunicándome la concesión d’un premiu lliterariu (S.M.R.A. 1986)